شعبيات

يا گـبـر اليلمك گـلي يا تابوت ؟
يادمعه العليك الخاطر اتجبره ؟
اسمك بالكبر ميفوت ادفنك وين
اذا دخلته يطلع كم حرف بره
چنت ويا اصدقائك خيط وابره اتصير
تخيطلهم مواقف لو شفت ثغره
واصد لجنازتك امك وكم مفجوع
موجودين بس ووجوهم صفره
العليهم هونت روحك فلا يسوون
گبل لتموت ماتت بيهم العشره
الگبر مو مالتك مال اليدفعك بي
تدگ الباب حتى ابطبة الحفره
ابمكانك لو متت يمكن اهواي ارتاح
يل ارتاحيت ابشرك ما شفت گطره
يطلع كم ضلع من اهد عبره اعليك
النفس من يدخل اگعد ساعه انتظره
كلشي ابغيبتك يوجعني حتى الشوف
على بدلت زواجك تكتل النظره
اذا تاخذ الصوتي صوره تلگه اكبور
امن اسولف بيك تطلع جثه بالنبره
دمعت امك عليك ابطول نهر النيل
واضافرها اعله موتك حفرت المجره
صارت ناي امك بالشكل والصوت
من اتسولف عليك الحايط اتكسره
من اتشوف اصدقائك تگعد اسبوعين
امك بالفراش وضيمها اشكبره
متت مره انته وادري ابموتك ارتاحيت
يذكروك وتموت امك الف مره
عفت مو بس مواقف ذكرى حلوه وياي
الف رحمة اعله روحك توجع الذكرى
احسك ما متت سفره اطلعت بس وين
عالفردوس گلي اشلونها السفره ؟